A Fundación Laboral de la Construcción de Galicia, recoñecida por Saúde Mental FEAFES Galicia polo seu traballo a prol da inserción laboral

A Fundación Laboral de la Construcción de Galicia recibiu onte, 16 de abril, de mans da Federación de Asociacións de Familiares e Persoas con Enfermidade Mental de Galicia (Saúde Mental FEAFES Galicia) un dos premios 'Empréganos 2026' como entidade colaboradora que "impulsa a inserción laboral de persoas con problemas de saúde mental."

A coordinadora do Centro de Ourense, María Antonia Nieto Alba, recolleu o recoñecemento en nome da entidade paritaria, nun acto que se celebrou no Teatro Principal de Ourense. 

A importancia do acompañamento especializado

Dende FEAFES Galicia lembran que a taxa de emprego das persoas con problemas de saúde mental sitúase no 22,3%, a máis baixa entre os distintos tipos de discapacidade segundo datos do INE. A entidade defende que estes problemas non teñen que resultar unha barreira para traballar e destaca que, co apoio adecuado, moitas persoas desempeñan a súa labor con compromiso e bo rendemento profesional.

Durante o acto, o presidente de FEAFES Galicia, Xosé Ramón Girón, destacou que ao longo de 2025 a entidade conseguiu que 924 persoas con problemas de saúde mental encontraran emprego en Galicia, o que supón o 72,3% das persoas atendidas. Na área de Ourense foron 120 as insercións laborais. Segundo indicou, estes datos mostran que o acompañamento especializado mellora de forma significativa as oportunidades laborais deste colectivo.

Saúde Mental FEAFES Galicia é unha organización sen ánimo de lucro que traballa desde 1995 na defensa dos dereitos e na mellora da calidade de vida das persoas con problemas de saúde mental e das súas familias. Actualmente integra 12 asociacións repartidas por toda Galicia e presta servizos en preto de 30 localidades.