A compravenda de vivendas modera o seu crecemento en Galicia en febreiro, cun leve ascenso do 3,9%
O incremento é 10 puntos inferior ao aumento rexistrado en España, con 2.173 operacións, segundo os datos publicados polo Instituto Nacional de Estadística (INE).
A compravenda de vivendas en Galicia aumentou un 3,9% en febreiro en comparativa co mesmo mes de 2024, con 2.173 operacións, segundo os datos publicados polo Instituto Nacional de Estadística (INE).
Unha evolución que amosa unha moderación no crecemento respecto ao 8,1% de xaneiro de 2025 e ao 22,3% do conxunto de 2024, que foi o maior crecemento de España.
De feito, en comparación co resto do Estado, o avance de Galicia está 10 puntos por debaixo da subida do 13,9% estatal, onde se produciron 59.682 operacións. De feito, o de Galicia é o terceiro peor dato por comunidades, só por riba da Comunidade Valenciana (3,6%) e a caída de Navarra (-26,7%).
Das operacións de compravenda, 2.112 realizáronse sobre vivendas libres e só 61 sobre protexida. Delas, 536 operacións corresponderon a vivendas novas e 1.637, a edificios usados. En total, realizáronse 3.999 operacións sobre vivendas: ademais das 2.173 compravendas, 951 foron herdanzas, 36 doazóns, seis permutas e 833 doutro tipo.
As hipotecas suben un 1,9% en febreiro
O número de hipotecas constituidas sobre vivendas subiu un 1,9% en febreiro en Galicia en relación ao mesmo mes de 2024, ata sumar 1.374, por un importe máximo aos 164,18 millóns de euros, segundo os datos do INE.
No conxunto estatal, o dato de hipotecas sobre vivendas subiu un 4,3% en febreiro interanual, ata sumar 39.084 préstamos, a súa maior cifra nun mes de febreiro dende 2011.
