A Fundación Laboral de la Construcción de Galicia e Cerámica Campo asinan un convenio de colaboración para impulsar o emprego no sector
Ambas entidades traballarán en accións conxuntas para impartir formación sobre os produtos da empresa, centrada na fabricación de materiais de construción en cerámica e formigón, así como na organización de visitas formativas aos seus catro centros de produción en Galicia
A Fundación Laboral de la Construcción de Galicia e a empresa Cerámica Campo asinaron un convenio de colaboración dirixido a impulsar a inserción laboral e o emprego no sector da construción.
Fernando García Novo, xerente da Fundación Laboral de la Construcción de Galicia, e Gonzalo Souto Blázquez, representante de Cerámica Campo, asinaron na sede da entidade paritaria en Santiago de Compostela un acordo de colaboración dirixido a impartir formación sobre os produtos da empresa, centrada na fabricación de materiais de construción en cerámica e formigón, así como na organización de visitas formativas aos seus catro centros de produción en Galicia.
Apoio á formación e ao desenvolvemento sostible
Ambas entidades comprométense a traballar en conxunto para impulsar o programa de apoio á formación Campo Sementa de Cerámica Campo, dirixido á promoción de "accións baseadas na difusión do coñecemento e na formación teórico-práctica co obxectivo de contribuír ao desenvolvemento sostible das esferas económica, social e ambiental da sociedade e das súas comunidades locais, así como do medio natural e construído e do tecido produtivo nos sectores da construción e da industria".
Cerámica Campo: catro plantas industriais en Galicia
Cerámica Campo fabrica materiais de construción (cerámica e prefabricados de formigón) dende 1940. Na actualidade, conta con catro plantas industriais e explotacións mineiras para a extracción de arxilas de alta calidade nas localidades de Villalonga, en Sanxenxo (Pontevedra); Lendo, en Laracha (A Coruña) e Albixoi, en Mesía (A Coruña).
