Máis de 1.000 estudantes de 16 centros educativos de Galicia participan na edición 2023 da Campaña 'Seguridade e Saúde + Cerca da Escola'
Concienciar ao alumnado sobre a importancia da Seguridade e da Saúde é o obxectivo desta actividade que se desenvolveu ao longo de 50 sesións en colexios e institutos da comunidade galega, durante os meses de outubro e novembro do ano pasado.
- Demostración práctica con alumnado do IES Ribeira Do Louro de O Porriño (Pontevedra).
- Varias das xornadas de OPPC con alumnos/as do colexio Hijas de Cristo Rey de Oleiros (A Coruña) e CEIFP A Xunqueira (Pontevedra).
- Sesión de OPPC realizada con rapaces e rapazas do IES Pintor Colmeiro de Silleda (Pontevedra).
Un total de 1.068 estudantes de 16 centros educativos (colexios e institutos) de toda Galicia participaron na edición 2023 da Campaña 'Seguridade e Saúde + Cerca da Escola', organizada pola Fundación Laboral de la Construcción en Galicia.
O obxectivo desta campaña é concienciar e sensibilizar ao alumnado sobre a importancia da Seguridade e a Saúde, establecendo similitudes entre os riscos que poidamos atopar no sector da construción e os riscos domésticos aos que poden estar expostos.
Durante os meses de outubro e novembro de 2023 desenvolvéronse 50 sesións en 16 centros educativos de toda Galicia: o IES Fernando Wirtz de A Coruña, o colexio Hijas de Cristo Rey de Oleiros (A Coruña), o IES Campo de San Alberto de Noia (A Coruña), o IES de Ames (A Coruña), o CIFP Porta da Auga de Ribadeo (Lugo), o CIFP Politécnico de Lugo, o IES Manuel Chamoso Lamas de Carballiño (Ourense), o IES Johan Carballeira de Bueu (Pontevedra), o CEIFP A Xunqueira de Pontevedra, o IES Marco do Camballón de Vila de Cruces (Pontevedra), o IES Chan do Monte de Marín (Pontevedra), o IES Escola Proval de Nigrán (Pontevedra), o IES Ribeira Do Louro de O Porriño (Pontevedra), o CPR San Fermín de Caldas de Reis (Pontevedra), o CIFP Fontecarmoa de Vilagarcía de Arousa (Pontevedra) e o IES Pintor Colmeiro de Silleda (Pontevedra).
Exemplos prácticos sobre os principais riscos e a súa prevención
Durante a actividade, o alumnado puido familiarizarse coas obras de construción, coñecendo os riscos máis habituais da industria e das técnicas de prevención, tales como medidas organizativas, medios de protección colectiva e Equipos de Protección Individual (EPIs) a través de exemplos prácticos que requeriron a súa participación activa e dun kit de sensibilización.
A Campaña 'Seguridade e Saúde + Cerca da Escola' forma parte das actividades realizadas polo Organismo Paritario para la Prevención en la Construcción (OPPC), creado para prestar apoio en materia preventiva ás pequenas e medianas empresas do sector e enmarcado no Convenio Xeral do Sector da Construción, ao igual que a Fundación Laboral de la Construcción, con quen comparte os ámbitos territoriais, funcionais e de actuación.
