Elevada inserción laboral das persoas participantes no Programa Integrado de Emprego de Fundación Laboral de Galicia 2024-2025

84 das 100 persoas participantes no Programa Integrado de Emprego de Fundación Laboral de la Construcción de Galicia 2024-2025, que acaba de finalizar, acadaron os obxectivos de inserción laboral, segundo datos da entidade paritaria. Desta maneira, a entidade partitaria de Galicia supera amplamente o obxectivo de inserción mínimo comprometido, situado no 45%. 

De acordo coa información proporcionada por Fundación Laboral de la Construcción, das 84 persoas que atoparon traballo, o 63% -é dicir, un total de 53- fixérono en construción e afíns, axudando a paliar a falta de man de obra do sector. Ademais, ao redor de 35 das 53 persoas insertadas en construción teñen 30 anos ou menos, polo que o proxecto contribuíu á remuda xeracional nunha industria moi envellecida e sen relevo. 

21 prácticas en empresas 

Formar en oficios e prevención de riscos laborais en construción e traballar a intermediación laboral directa co tecido empresarial para mellorar a empregabilidade é a finalidade do programa, dirixido a persoas desempregadas das comarcas de A Coruña, Santiago de Compostela e Vigo. 

O Programa Integrado de Emprego de Fundación Laboral de la Construcción de Galicia 2024-2025, concedido pola Consellería de Emprego, Comercio e Emigración e financiado pola Xunta de Galicia e o Servicio Público de Empleo Estatal (SEPE), dirixiuse a 21 persoas no Centro de Arteixo, 29 no Centro de Santiago e 50 no Centro de Vigo.

As persoas participantes contaron cun acompañamento e intermediación para asesoralas e orientalas sobre as oportunidades de formación e emprego que mellor encaixan coas súas situacións persoais e profesionais. Para iso, as empresas do sector achegáronse aos Centros de Fundación Laboral coa fin de coñecer e entrevistar ás persoas participantes que finalmente realizaron 21 prácticas en empresas.

Máis de 860 horas de formación vencellada ao sector

O programa incluíu 866 horas de formación en 35 Especialidades Formativas do SEPE relacionadas co sector da construción tales como montaxe de estadas apoiadas; execución de paredes de ladrillo con revestimentos de placa de xeso; colocación de revestimentos continuos en fachadas; colocación de Sistemas de Illamento Térmico polo Exterior (SATE); operacións con plataformas elevadoras móbiles de persoal (PEMP) e formigón. 

Ademais cada participante dispuxo dunha bolsa de asistencia de 10€/día así como medidas de conciliación.

A finalidade deste tipo de programas é contribuír á dinamización do mercado laboral, implementando estratexias e accións conducentes a incrementar a empregabilidade e acadar a inserción laboral das persoas en busca activa de emprego.